ដំណាក់កាលទាំងបួននៃឆាកជីវិត
ឆាកជីវិតមនុស្សតែងឆ្លងកាត់ ៤ ដំណាក់កាល ដំណាក់កាលអប់រំ ដំណាក់កាលមនោសញ្ចេតនានិងបទពិសោធន៍ ដំណាក់កាលអំណាច ដំណាក់កាលអមតភាព។
ដំណាក់កាលទី១នៃឆាកជីវិតគឺដំណាក់កាលអប់រំ៖ ដំណាក់កាល នេះ រាប់ចាប់តាំងពី ចាប់កំណើតរហូតដល់អាយុ ២០ ឆ្នាំ ឬ ២៥ ឆ្នាំ។ ក្នុងដំណាក់កាលនេះ មនុស្សយើងរៀនសូត្រអំពីគោលការណ៍គ្រឹះនៃឆាកជីវិត អំពីចំណេះដឹង ឬបទពិសោធន៍ដែលបានមកពីអ្នកនៅជុំវិញខ្លួន។ ដំណាក់កាលអប់រំ គឺជាគ្រឹះក្នុងឆាកជីវិតមនុស្សម្នាក់ៗ។ គ្រឹះនេះបើសាងមិនបានមាំល្អទេ នឹងធ្វើឲ្យជីវិតប្រេះបែកនៅថ្ងៃអនាគត។ ប៉ុន្តែបើសង់បានត្រឹមត្រូវ ដោយផ្អែកលើសច្ចភាព ក្តីមេត្តា ភក្តីភាព វិន័យ ជំនឿចិត្ត និងភាពវិជ្ជមាន នេះកិច្ចការអ្វីៗក៏អាចសម្រេចទៅបានដែរ។
ដំណាក់កាលទី២នៃឆាកជីវិតគឺដំណាក់កាលមនោសញ្ចេតនានិងបទពិសោធន៍៖ ដំណាក់ កាលនេះចាប់ផ្តើមពីអាយុ ២០ ឆ្នាំ ឬ២៥ឆ្នាំ ដល់អាយុ ៤០ឆ្នាំឬ៥០ឆ្នាំ។ ដំណាក់កាលនេះមនុស្សចាប់ផ្តើមពិសោធន៍សាកល្បង និងធ្វើអ្វីៗដើម្បីខ្លួនឯង។ មនុស្សចូលប្រលូក ក្នុងស្នេហា មនោសញ្ចេតនា សុរា ការប្រកួតប្រជែង ជោគជ័យ បរាជ័យ កំហឹង ឬអារម្មណ៍សប្បាយរំភើប។ វាជាដំណាក់កាលមួយដែលមនុស្សជាច្រើនជាប់ជំពាក់ក្នុងរឿងជីវិត ជាប់ជំពាក់នឹងមនុស្សជាទីស្រឡាញ់ ឬជាប់ជំពាក់នឹងគ្រួសារជាដើម។ មនុស្សប្រុសច្រើនជាប់ជំពាក់នឹងរឿងរួមភេទ សុរា ឬអំណាច ចំណែកឯមនុស្សស្រីច្រើនជាប់ជំពាក់នឹងការស្វែងរកស្នេហាពិត។ ដំណាក់កាលទី២នេះ ជាដំណាក់កាលដែលមនុស្ស ត្រូវប្រឈមមុខនឹងឆាកជីវិតពិតប្រាកដ ត្រូវដោះស្រាយតើធ្វើដូចម្តេចទើបមានដំបូលជ្រក តើធ្វើដូចម្តេចទើបមានអាហារក្នុងចាន ។ល។ ក្នុងដំណាក់កាលនេះ គេគួររៀនពីវិធីគ្រប់គ្រងខ្លួនឯង និងដាក់វិន័យខ្លួនឯង។
ដំណាក់កាលទី៣នៃឆាកជីវិតគឺដំណាក់កាលអំណាច៖ ដំណាក់កាល នេះចាប់ផ្តើមពីអាយុ ៤០ឆ្នាំឬ៥០ឆ្នាំ ដល់អាយុ៦០ឆ្នាំឬ៧៥ឆ្នាំ។ វាជាដំណាក់កាលដែលមនុស្សមានសមត្ថភាពពេញលេញបំផុត នឹងញ៉ាំងឲ្យរឿងរ៉ាវគ្រប់យ៉ាងឲ្យកើតឡើងបាន ជាដំណាក់កាលជោគជ័យបំផុត ហើយក៏អាចជាដំណាក់កាលបរាជ័យបំផុតដែរ។ ក្រៅពីនេះ វាជាដំណាក់កាលនៃការចែករំលែកបទពិសោធន៍ទៅកាន់មនុស្សដទៃផងដែរ។
ដំណាក់កាលទី៤នៃឆាកជីវិតគឺដំណាក់កាលអមតភាព៖ ដំណាក់កាលនេះចាប់ផ្តើមពីអាយុ ៦០ឆ្នាំឬ៧៥ឆ្នាំ ដល់១០០ឆ្នាំ។ ប្រសិនបើមនុស្សអាចគ្រប់គ្រងដំណាក់កាលអំណាចបានហើយ នោះគេនឹងអាចឈានចូលដល់ដំណាក់កាលអមតភាពយ៉ាងងាយ។ ដំណាក់កាលនេះ មនុស្សប្រមើលមើលវែងឆ្ងាយផុតពីជីវិតត្រឹមតែមួយជាតិ។ មនុស្សចង់ឃើញស្នាដៃរបស់ខ្លួនស្ថិតស្ថេរជាអមតៈ ជាប្រយោជន៍សម្រាប់មនុស្សទូទាំងពិភពលោក។ មនុស្សខិតខំពុះពារគ្រប់បែបយ៉ាងដើម្បីស្នាដៃមួយនេះ។
ប្រែសម្រួលដោយ សាលារៀន salarean.com