ព្រឹកព្រលឹមមានតម្លៃដូចមាស
ពេលវេលាជាមាសប្រាក់។ ពេលវេលាមានតម្លៃមិនអាចកាត់ថ្លៃបាន។ ដើម្បីឲ្យជីវិតមានន័យមនុស្សគ្រប់រូបគួរចំណាយពេលវេលាដោយប្រុង ប្រយ័ត្ន និងប្រកបដោយគុណភាពដែលជួយលើកកំពស់ជីវិតនិងជីវភាពរស់នៅរបស់ ខ្លួន។ ពេលវេលាដែលគេគួរចំណាយដោយប្រុងប្រយ័ត្នបំផុត គឺពេលព្រឹកព្រលឹម ព្រោះវាជាចំនុចចាប់ផ្តើមនៃថ្ងៃទាំងមូល។ បើចាប់ផ្តើមឡើងមិនល្អហើយ វានឹងបណ្តាលឲ្យល្អក់កករ។ ជារៀងរាល់ថ្ងៃគេគួរ៖
១. ចូរចំណាយពេល ៣០ នាទីរៀងរាល់ព្រឹក ដើម្បីរំលឹកឡើងវិញនូវគោលដៅជីវិតរបស់អ្នក។ មនុស្សជោគជ័យភាគច្រើនតែងចំណាយពេលវេលា រាល់ព្រឹកមុនធ្វើអ្វីៗទាំងអស់ ដើម្បីស្វែងយល់ពីខ្លួនឯង។
២. ចូរគិតនិងនាំតែរឿងល្អៗដាក់ខ្លួន គិតតែក្នុងផ្លូវវិជ្ជមាននូវផែនការអនាគត។
៣. ចូរប្រើបា្រស់ពេលវេលាដ៏ស្ងប់ស្ងាត់ឲ្យមានប្រយោជន៍បំផុត(ពិសេស ពេលព្រឹកព្រលឹម)៖ (១)ពិនិត្យមើលផែនការជីវិត (២) រិះរកវិធីល្អៗដើម្បីសម្រេចគោលដៅ (៣) រៀនសូត្រពីមេរៀនជីវិត និងសំលឹងឆ្ពោះទៅមុខទៀត។
៤. ចូរធ្វើលំនឹកគិតមួយថា ក្តីសុបិន្តរបស់អ្នកបានក្លាយជាការពិត រួចបិទភ្នែកសម្រាកដោយទឹកមុខញញឹម ។ ឧទាហរណ៍ ខ្ញុំរកបានប្រាក់ x លានដុល្លារ។ នេះជាលំហាត់ចិត្តដ៏សំខាន់និងមានប្រយោជន៍បំផុត ដល់ជោគជ័យក្នុងឆាកជីវិត។
៥. ចូរបន្តខំប្រឹងជានិច្ច ទោះបីធ្វើមួយលើកមិនបានសម្រេច ក៏នៅតែបន្តធ្វើទៀត។ ការប្រឹងប្រែងមិនដែលឥតប្រយោជន៍ទេ។ ចូរធ្វើខ្លួនឲ្យដូចជាមេដែក ស្រូបទាញយកគំនិតនិងឱកាសនៅជុំវិញខ្លួន។
ប្រែសម្រួលរៀបរៀងដោយ៖ សាលារៀន salarean.com